tufan ba-dil hai har koi dildar dekhna
gul ho na jaae mishal-e-rukhsar dekhna
atish ba-jan hai har koi sarkar dekhna
lau de uthe na turra-e-tarrar dekhna
jazb-e-musafiran-e-rah-e-yar dekhna
sar dekhna, na sang, na divar dekhna
ku-e-jafa men qaht-e-kharidar dekhna
ham aa gae to garmi-e-bazar dekhna
us dil-navaz shahr ke atvar dekhna
be iltifat bolna, bezar dekhna
khali hain garche masnad o mimbar, nigun hai khalq
roab-e-qaba o haibat-e-dastar dekhna
jab tak nasib tha tira didar dekhna
jis samt dekhna, gul-o-gulzar dekhna
phir ham tamiz-e-roz-o-mah-o-sal kar saken
ai yad-e-yar phir idhar ik baar dekhna
Leave a Reply