Imran Aami
baat dil ko mire lagi nahin hai
mere bhaa.i ye sha.eri nahin hai
janti hai mire charagh ki lau
kaun se ghar men raushni nahin hai
vo ta.alluq bhi mustaqil nahin tha
ye mohabbat bhi da.imi nahin hai
main jo qissa suna chuka to khula
koi divar bolti nahin hai
dekhne vaali aankh bhi to ho
kaun dariya men jal-pari nahin hai
buzdila chhup ke vaar karta hai
tujh ko tahzib-e-dushmani nahin hai
kya karun is bahisht ko jis men
ek botal sharab ki nahin hai
tujh se milna bhi hai nahin bhi mujhe
aur tabi.at ulajh rahi nahin hai
kaun se shahr ke charagh ho tum
tum men dam bhar ki raushni nahin hai
jis ka charcha hai shahr men ‘ami’
vo ghazal to abhi kahi nahin hai
Leave a Reply