Ayub Khawar
aankh ki dahliz se utra to sahra ho gaya
qatra-e-ḳhun paniyon ke saath rusva ho gaya
ḳhaak ki chadar men jism o jaan simaTte hi nahin
aur zamin ka rang bhi ab dhuup jaisa ho gaya
ek ik kar ke mire sab lafz miTTi ho ga.e
aur is miTTi men dhans kar main zamin ka ho gaya
tujh se kya bichhḌe ki ankhen reza reza ho ga.iin
aa.ina TuuTa to ik a.ina-ḳhana ho gaya
ai hava-e-vasl chal phir se gul-e-hijran khila
sar uTha phir ai nihal-e-gham savera ho gaya
ai jamal-e-fan use mat ro ki tan-asan tha
teri duniyaon ka ‘ḳhavar’ sarf-e-duniya ho gaya
Leave a Reply