Majid Ali Kavish
ham un se mil ke unhi ke asar men rahte hain
safar se aa ke bhi jaise safar men rahte hain
vo qahqahe jinhen honTon ka dar nasib nahin
vo ashk ban ke miri chashm-e-tar men rahte hain
hamare ishq ke tohfe ko ehtiyat se rakh
bahut se lauTne vaale nagar men rahte hain
bhula.ega koi kaise karam rafiqon ke
ye tiir vo hain jo har-dam jigar men rahte hain
na maan ka pyaar mayassar na apne ghar ka sakun
vo kaise log hain ja kar qatar men rahte hain
hasin misal hai baham nibah ki ‘kavish’
gulab jitne hain kanTon ke ghar men rahte hain
Leave a Reply