Ek KHwab laDakpan Mein Jo Dekha Tha Wo Tum The

Murtaza Barlas

ik ḳhvab laḌakpan men jo dekha tha vo tum the

paikar jo tasavvur men ubharta tha vo tum the

ik aisa ta.alluq jo ta.alluq bhi nahin tha

phir bhi main jise apna samajhta tha vo tum the

tha qurb ki ḳhvahish men bhi kuchh husn ajab sa

jo gird mire rang tha naghma tha vo tum the

yak-dam jo ye tanha.i mahakne si lagi thi

jhonka jo abhi ḳhushbu ka guzra tha vo tum the

is vaste mai-ḳhvari ka ilzam tha mujh par

mujh men jo vo ik nashsha sa rahta tha vo tum the

ghibat ka hadaf tum ne jo rakkha tha vo main tha

aur main ne jise TuuT ke chaha tha vo tum the

be-masraf-o-be-kar huun ab raakh ki manind

chingari thi jo mujh men jo sho.ala tha vo tum the

lagta hai vo shahr ab kisi aseb-zada sa

kya jis ke liye jashn sa barpa tha vo tum the