jitne log nazar aate hain sab ke sab begane hain
aur vahi hain duur nazar se jo jane-pahchane hain
zanjiron ka bojh liye hain be-divar ke zindan men
phir bhi kuchh avaz nahin hai kaise ye divane hain
bach bach kar chalte hain har-dam shishe ki divaron se
kaun kahe divana un ko ye to sab farzane hain
ḳhud hi bujha dete hain sham.en raushniyon se ghabra kar
is mahfil men ai logo kuchh aise bhi parvane hain
sayyadon ne gul-chinon ne gulshan ko taraj kiya
lekin ham divanon se abad abhi virane hain
un ka gham hai apna gham hai apne para.e sab ka gham
shahr-e-vafa men phir bhi ‘farhat’ aur ka.i gham-ḳhane hain
Leave a Reply