le ke hathon men mohabbat ke guhar aa.e hain
ik nazar dekh tire ḳhak-basar aa.e hain
ik ajab dhaḌka dil-o-jan ko laga rahta hai
jab bhi pardes se ham lauT ke ghar aa.e hain
jis taraf bhi main gaya main ne jidhar bhi dekha
zaḳhm ki tarah mujhe log nazar aa.e hain
nok-e-neza ki taraf ek nazar dekh zara
kis bulandi pe vo ushshaq ke sar aa.e hain
mom ho jaa.e vo patthar ki tarah saḳht badan
apne nalon men kahan itne asar aa.e hain
sar-phiri andhi girane use aa pahunchi hai
aas ke peḌ pe jis dam se samar aa.e hain
jab se utra hai safina mira sahil pe ‘nabil’
mauj-dar-mauj kinare pe bhanvar aa.e hain
Leave a Reply