Jaan Qurban Kaun Karta Hai

jaan qurbān kaun kartā hai

apnā nuqsān kaun kartā hai

sab tirī zulf ke hisār meñ haiñ

par ye elaan kaun kartā hai

terī qurbat kise aziiz nahīñ

dil ko vīrān kaun kartā hai

log to mushkiloñ meñ Dālte haiñ

mushkil āsān kaun kartā hai

tum taġhāful agar nahīñ karte

to mirī jaan kaun kartā hai

but-parastī to ham bhī karte haiñ

tark īmān kaun kartā hai

apnī apnī zarūrateñ haiñ ‘qais’

varna ehsān kaun kartā hai

Leave a Comment