Jigar Barelvi
raas jab zindagi nahin aati
to ‘jigar’ maut bhi nahin aati
choT khata nahin hai dil jab tak
ravish-e-zindagi nahin aati
saath deti nahin agar taqdir
raas tadbir bhi nahin aati
dil ko jab tak lage na koi baat
rang par zindagi nahin aati
hasrat-o-yas-o-gham sabhi dil men
aate hain ik ḳhushi nahin aati
hijr hai maut aur hijr baghair
ishq men zindagi nahin aati
samjhen kyunkar ‘jigar’ ka haal achchha
ruḳh pe jab tazgi nahin aati
Leave a Reply