Arshad Siddiqui
kitne saaqi ma-e-gulfam liye phirte hain
aur ham hain ki tahi-jam liye phirte hain
umr guzri ke tabassum ki tarah honTon par
talḳhi-e-gardish-e-ayyam liye phirte hain
tazkire hain ye chaman men ki sabhi lala-o-gul
nik.hat-e-ariz-e-gulfam liye phirte hain
sharm ai husn-e-jafa-pesha ki kuche men tire
aaj tak ham dil-e-nakam liye phirte hain
jaane kya dekha hai un shoḳh nigahon men ki ham
apne sar muft ka ilzam liye phirte hain
jab se ham ne tire kuche se guzarna chhoḌa
nama-bar shahr men paigham liye phirte hain
kya karenge vo miri raton ko raushan ‘arshad’
ruḳh pe jo zulf-e-siyah-fam liye phirte hain
Leave a Reply