saans chalti rahti hai zindagi nahin hoti
bebasi ke lamhon men sha.iri nahin hoti
ishq baat karta hai dil tavaf karta hai
ird-gard phirne se ashiqi nahin hoti
zindagi ke sahra men ek chand kaafi hai
qumqumon ki kasrat se raushni nahin hoti
ḳhuun ki ravani men is qadar mohabbat hai
nafraton ke halqon se dosti nahin hoti
ḳhvahishon ke lashkar se roz laḌta rahta huun
ye bhi ik muamma hai dushmani nahin hoti
tum ne but bana.e hain tum ko hi mubarak hon
but-shikan qabile se azari nahin hoti
sab ḳhizan ke patton men gul-bahar manzar hai
ḳhushbuon ke aane ki muḳhbiri nahin hoti
Leave a Reply