Allama Iqbal
la phir ik baar vahi baada o jaam ai saaqi
haath aa jaae mujhe mera maqam ai saaqi
tiin sau saal se hain hind ke mai-khane band
ab munasib hai tira faiz ho aam ai saaqi
meri mina-e-ghazal men thi zara si baaqi
shekh kahta hai ki hai ye bhi haram ai saaqi
sher mardon se hua besha-e-tehqiq tahi
rah gae suufi o mulla ke ghulam ai saaqi
ishq ki tegh-e-jigar-dar uda li kis ne
ilm ke haath men khali hai niyam ai saaqi
siina raushan ho to hai soz-e-sukhan ain-e-hayat
ho na raushan to sukhan marg-e-davam ai saaqi
tu miri raat ko mahtab se mahrum na rakh
tire paimane men hai mah-e-tamam ai saaqi
Leave a Reply