kab tak rahun main ḳhauf-zada apne aap se
ik din nikal na ja.un zara apne aap se
jis ki mujhe talash thi vo to mujhi men tha
kyuun aaj tak main duur raha apne aap se
duniya ne tujh ko mera muḳhatab samajh liya
mahv-e-suḳhan tha main to sada apne aap se
tujh se vafa na ki to kisi se vafa na ki
kis tarah intiqam liya apne aap se
lauT aa darun-e-dil se pukare koi mujhe
duniya ki aarzu men na ja apne aap se
Leave a Reply