har gaam pe avargi-o-dar-ba-dari men
ik dhyan ka saaya hai miri ham-safari men
ta-hadd-e-nazar pighli hui ret ka dariya
kis samt nikal aa.e hain ye be-ḳhabari men
kis ki tarab-andaz-nazar ghol rahi hai
andoh-o-gham-o-soz mizaj-e-bashari men
kya koi kahin kunj-e-ḳhayaban-e-sukun hai
ai dasht-e-gham-e-zist tiri be-shajari men
ai qarya-e-dil dekh guzarti hai isi taur
har shahr pe barbadi-o-zer-o-zabari men
ahl-e-talab-o-shauq zamanon se paḌe hain
arsa-gah-e-ḳhud-sozi-o-hairan-nazari men
lahra.e na lahra.e vo ab barq-e-ḳhad-o-ḳhal
ab ham nahin ḳhar-e-ḳhas-e-ashufta-sari men
ik hamdam-e-derina ki yadon ki kasak hai
ḳhushbu-e-ḳhush-anfasi-e-bad-e-sahari men
nigaran miri janib nigah-e-ḳhush-hunran hai
kuchh to hunar aḳhir hai miri be-hunari men
ik tesha-e-sad-para ki surat hain ‘bashir’ ab
hasil yad-e-tula tha jinhen shisha-gari men
Leave a Reply