Krishna Kumar Toor
mujh men maujud hai jo chaak nahin khulta kuchh
ye mira dida-e-namnak nahin khulta kuchh
naqsh ubhrega koi ya ki nahin ubhrega
kya hai poshida tah-e-ḳhak nahin khulta kuchh
ye to tai hai ki ab is dil ka ziyan lazim hai
vo hai ma.asum ki chalak nahin khulta kuchh
muntazir kaun se main alam-e-asbab ka huun
kya hai ab qismat-e-ḳhashak nahin khulta kuchh
kyuun bhala us ki nishani nahin milti mujh ko
kyuun bhala ghurfa-e-idrak nahin khulta kuchh
ab ye kya hai mire atraf nahin aata samajh
aur ye matla-e-pechak nahin khulta kuchh
band kyuun ashk na hon tab-e-ravan se ai ‘tur’
vo bhi to surat-e-aflak nahin khulta kuchh
Leave a Reply