yuun naqab-e-ruḳh-e-zeba bhi uTha di kis ne
ḳhirman-e-dil pe ye bijli si gira di kis ne
dastan bhuli hui yaad palaT aa.i hai
ahd-e-rafta ki ye tasvir dikha di kis ne
kis ne tanha.i ki ik umr gavara kar li
zindagi tere tasavvur men miTa di kis ne
zinda rahne ki havas phir se palaT aa.i hai
mujh ko yaaro ye sar-e-dar sada di kis ne
ye kaḌi dhuup kaḌe kos ye sahra-e-basit
abla-pa.i ki ‘anjum’ ko saza di kis ne
Leave a Reply