khoya hua tha hasil hone vaala huun
main kaghaz par nazil hone vaala huun
chhoḌ aaya huun pichhe sab avazon ko
ḳhamoshi men daḳhil hone vaala huun
ḳhud hi apna rasta dekh raha huun main
ḳhud hi apni manzil hone vaala huun
mujh ko sharik-e-mahfil bhi kab samjhen vo
main jo jan-e-mahfil hone vaala huun
jaane kya kah ja.ega Dar lagta hai
a.ine ke muqabil hone vaala huun
ruuh sulagti aur pighalti jaati hai
ek badan men shamil hone vaala huun
aḳhir kab tak apne naaz uTha.un ‘shaz’
aaj apna hi qatil hone vaala huun
Leave a Reply