tiri umidon ka saath degi inayat-e-barg-o-bar kab tak
bahar hai mehrban tujh par magar rahegi bahar kab tak
jala.i tu ne agar na mash.al koi charagh aur DhunD lenge
jinhen zarurat hai raushni ki karenge vo intizar kab tak
ḳhayal-e-tausi.a o rif.at-e-bam-o-dar ki ḳhvahish baja hai lekin
makan ka bojh sah sakegi bina-e-na-pa.edar kab tak
tujhe guman hai ki ḳhvab tere shikast se mavara hain shayad
tujhe bacha.ega sang-bari se a.inon ka hisar kab tak
kabhi to gulzar barishon se chaman ka mahaul saaf hoga
faza men phaila.ega kudurat hava se uḌta ghubar kab tak
Leave a Reply