Poet
ḳhaak men mujh ko miri jaan mila rakkha hai
kya main aansu huun jo nazron se gira rakkha hai
ik tumhin ko nahin bechain bana rakkha hai
arsh bhi to mire nalon se hila rakkha hai
sorish-e-hijr ne ik sim-badan ke mujh ko
aisa phunka hai ki iksir bana rakkha hai
ik pari-vash ki inayat ne zamane men mujhe
vaqt ka apne sulaiman bana rakkha hai
apne saaya se bhaḌak kar kaha us shoḳh ne yuun
mire allah kise saath laga rakha hai
dil to deta huun miri jaan magar gham hai yahi
mere armanon ne ghar is men bana rakkha hai
dil ke talib jo hua karte hain ashiq se hasin
to unhen husn ne ye kaam sikha rakkha hai
samne aate hue kis liye sharmate ho
jab miri aankh men ghar tum ne bana rakkha hai
muft dil ko mire ai barq vash ulfat hai tiri
muztarib surat-e-simab bana rakkha hai
teri duz-dida nigahen ye pata deti hain
ki inhin choron ne dil mera chura rakkha hai
maal chori ka nahin jab to bata do mujh ko
tum ne kis chiiz ko muTThi men daba rakkha hai
tum ne kyuun dil men jagah di hai buton ko ‘sabir’
tum ne kyuun kaaba ko but-ḳhana bana rakkha hai
Leave a Reply