rishton ke jab taar ulajhne lagte hain
aapas men ghar-bar ulajhne lagte hain
maazi ki ankhon men jhank ke dekhun to
kuchh chehre har baar ulajhne lagte hain
saal men ik aisa mausam bhi aata hai
phulon se hi ḳhaar ulajhne lagte hain
ghar ki tanha.i men apne-ap se ham
ban kar ik divar ulajhne lagte hain
ye sab to duniya men hota rahta hai
ham ḳhud se be-kar ulajhne lagte hain
kab tak apna haal bata.en logon ko
tang aa kar bimar ulajhne lagte hain
jab dariya ka koi chhor nahin milta
kashti se patvar ulajhne lagte hain
kuchh ḳhabron se itni vahshat hoti hai
hathon se aḳhbar ulajhne lagte hain
koi kahani jab bojhal ho jaati hai
naTak ke kirdar ulajhne lagte hain
Leave a Reply