Ayaadat

ye kaun aa gaya ruḳh-e-ḳhandan liye hue

aariz pe rang-o-nur ka tufan liye hue

bimar ke qarib ba-sad-shan-e-ehtiyat

dildari-e-nasim-e-baharan liye hue

ruḳhsar par latif si ik mauj-e-sar-ḳhushi

lab par hansi ka narm sa tufan liye hue

peshani-e-jamil pe anvar-e-tamkanat

tabindagi-e-sub.h-e-daraḳhshan liye hue

zulfon ke pech-o-ḳham men baharen chhupi hui

ik karvan-e-nikhat-e-bustan liye hue

aa hi gaya vo mera nigar-e-nazar-navaz

zulmat-kade men sham-e-farozan liye hue

ik ik ada men saikadon pahlu-e-dildahi

ik ik nazar men pursish-e-pinhan liye hue

mere savad-e-shauq ka ḳhurshid-e-nim-shab

azm-e-shikast-e-mah-jabinan liye hue

dars-e-sukun-o-sabr ba-in ehtamam-e-naz

nishtar-zani-e-jumbish-e-mizhgan liye hue

ankhon se ek rau si nikalti hui har aan

gharqabi-e-hayat ka saman liye hue

hilti hui nigah men bijli bhari hui

khilte hue labon men gulistan liye hue

ye kaun hai ‘majaz’ se sar-garm-e-guftugu

donon hatheliyon pe zanaḳhdan liye hue

Leave a Comment