Poet
mahv-e-ruḳh-e-yar ho ga.e ham
so ji se nisar ho ga.e ham
fitrak se bandh ḳhvah mat bandh
ab tere shikar ho ga.e ham
daman ko na pahunche tere ab tak
har chand ghubar ho ga.e ham
aata nahin koi ab nazar men
kis se ye do-char ho ga.e ham
tha kaun ki dekhte hi jis ke
yuun ashiq-e-zar ho ga.e ham
hasti hi hijab thi jo dekha
is bahar se paar ho ga.e ham
‘bedar’ sarishk-e-lala-gun se
ham-chashm-e-bahar ho ga.e ham
Leave a Reply