zamin ghubar samundar sahab apni jagah
magar main aur mira iztirab apni jagah
hava ki zad men hai har chiiz ḳhar-o-ḳhas ki tarah
kaho paḌe rahen chup-chap ḳhvab apni jagah
agarche bikhri hai raakh us ki mere charon taraf
vo lamha ab bhi hai apna javab apni jagah
mire aqab men hai avaza-e-numu ki guunj
hai dasht-e-jan ka safar kamyab apni jagah
zaban ko deta hai ehsas-e-tishnagi se najat
vo za.iqa hai sukut-e-sarab apni jagah
na jaane hoga kahan ḳhema-e-badan ‘ishrat’
ki chhoḌne ko hai har ik tanab apni jagah
Leave a Reply