kai saval machalte hain har saval ke baad
shab-e-visal se pahle shab-e-visal ke baad
na jaane kyuun ye mira dil dhadakne lagta hai
tire khayal se pahle tire khayal ke baad
har ek daav se vaqif thi ai mire hamdam
main teri chaal se pahle main teri chaal ke baad
na jaane kyuun tiri yaden tavaf karti hain
kisi malal se pahle kisi malal ke baad
tiri qasam tira chehra hi ru-ba-ru tha mire
tire saval se pahle tire saval ke baad
faza men qaus-e-quzah si bikhar gai har samt
tire jamal se pahle tire jamal ke baad
kahan thi ek hi halat mire dil-o-jan ki
tire khayal se pahle tire khayal ke baad
amir-e-shahr unhen yaad kar jo saath rahe
tire zaval se pahle tire zaval ke baad
koi hai ‘rumi’ musalsal saval karta hai
mire saval se pahle mire saval ke baad