Ye Shahr-E-Gul KHash-O-KHashak Ho Gaya Kaise

ye shahr-e-gul ḳhash-o-ḳhāshāk ho gayā kaise

mujhe pata nahīñ ġhamnāk ho gayā kaise

jis aadmī ne kināra kabhī nahīñ dekhā

samundaroñ kā vo tairāk ho gayā kaise

kahīñ charāġh kī maddham sī raushnī bhī nahīñ

to phir ye dāman-e-shab chaak ho gayā kaise

zamāna kahtā rahā jis ko umr bhar ahmaq

vo shaḳhs sāhab-e-idrāk ho gayā kaise

havā-e-tund ko is baat par ta.ajjub hai

charāġh raah kā bebāk ho gayā kaise

havā meñ koī sharar kā gumāñ na thā ‘ātish’

to phir shajar kā badan ḳhaak ho gayā kaise

Leave a Comment