vo dost tha to usi ko adu bhi hona tha
lahu pahan ke mujhe surḳh-ru bhi hona tha
sunahri haath men taaza lahu ki fasl na di
ki apne haq ke liye jang-ju bhi hona tha
bagula ban ke samundar men ḳhaak uḌana thi
ki lahar lahar mujhe tund-ḳhu bhi hona tha
mire hi harf dikhate the meri shakl mujhe
ye ishtihar mire ru-ba-ru bhi hona tha
kashish thi phuul si is men to la-muhala mujhe
asir-e-rang giraftar-e-bu bhi hona tha
saza to milna thi mujh ko barahna lafzon ki
zaban ke saath labon ko rafu bhi hona tha
safar ka bojh uThane se peshtar ‘sajid’
mizaj-dan-e-rah-e-justuju bhi hona tha
Leave a Reply