Najma Shaheen Khosa
zindagi be-qarar lagti hai
dard ki abshar lagti hai
phir se sham-e-firaq aa.i ab
aankh bhi ashk-bar lagti hai
zaḳhm dil ke shumar karti huun
har ghaḌi sogvar lagti hai
kya bata.un ye hasti-e-mauhum
ek musht-e-ghubar lagti hai
sardiyon ki udaas raton men
chandni bhi ghubar lagti hai
bad-nasibi na puchhiye ‘shahin’
zindagi sho.ala-bar lagti hai
Leave a Reply