Ahmad Zafar
vo phuul jo muskura raha hai
shayad mira dil jala raha hai
chhup kar koi dekhta hai mujh ko
ankhon men magar sama raha hai
main chand ke saath chal raha huun
vo meri hansi uda raha hai
shayad kisi daur men vafa thi
ye daur to bevafa raha hai
sau rang hain zindagi ke lekin
insan fareb kha raha hai
tasvir bane to mujh se kaise
har naqsh mujhe mita raha hai
jo lamha payam hai fana ka
chup-chap qarib aa raha hai
tufan ne bhi aankh khol di hai
sahil bhi nazar bacha raha hai
fankar kahun use to kaise
takhliq ko jo mita raha hai
taqdir mita chuki thi jis ko
tadbir ka raaz pa raha hai
avaz se aag lag rahi hai
mutrib hai ki giit ga raha hai
ehsas-e-shikast-o-kamrani
aine kai dikha raha hai
vo khak-nashin ‘zafar’ hai yaaro
jo su-e-falak bhi ja raha hai
Leave a Reply