Mufahamat

jab us ka bosa leta tha cigarette ki bu nathnon men ghus jaati thi

main tambaku-noshi ko ik aib samajhta aaya huun

lekin ab main aadi huun, ye meri zaat ka hissa hai

vo bhi mere danton ki bad-rangi se manus hai, in ki aadi hai

jab ham donon milte hain, lafzon se begana se ho jaate hain

kamre men kuchh sansen aur pasine ki buu, tanhai rah jaati hai!

ham donon shayad murda hain ehsas ka chashma sukha hai

ya phir shayad aisa hai ye afsana bosida hai

dard-e-zeh se ziist yunhi halkan tadapti rahti hai

nae masiha aate hain aur suuli par chadh jaate hain

ik matiyala insan safon ko chiir ke aage badhta hai aur mimbar se chillata hai

ham maslub ke varis hain ye khuun hamara virsa hai

aur vo sab adarsh, vo sab jo vajh-e-malamat thahra tha

is matiyale shakhs ke gahre meade men khup jaata hai

phir tafsiron aur tavilon ki shakl men bahar aata hai

ye tavilen majburon ka ik mauhum sahara hain

ya shayad sab ka sahara hain

yunhi men adarsh insan ka juuya huun

sab hi sapne dekhte hain khvabon men hava men udte hain

phir ik manzil aati hai jab phuut phuut kar rote hain

shakhon ki tarah tutte hain

ik ruh-e-jan-o-dil ko jo duniya men sab se badh kar hai pa lete hain

phir us se nafrat karte hain go phir bhi mohabbat karte hain!

main us se nafrat karta huun vo mujh ko niich samajhti hai

lekin jab ham milte hain tanhai men tariki men

donon aise ho jaate hain jaise aghushta mitti hain

nafrat zam ho jaati hai ik sannata rah jaata hai

sannata takhliq-e-zamin ke baad jo har-su taari tha

ham donon tutte rahte hain jaise ham kachchi shakhen hain

khvabon ka zikr nahin karte donon ne kabhi jo dekhte the

khushiyon ka zikr nahin karte jo kab ki supurd-e-khak huiin

bas donon tutte rahte hain

main bada-noshi par maail huun, vo cigarette piiti rahti hai

ik sannate ki chadar men ham donon lipte jaate hain

ham donon tutte rahte hain jaise ham kachchi shakhen hain!