log jis shaḳhs ko sardar bana dete hain
apni taqdir ka muḳhtar bana dete hain
sher ka rishta kisi fikr se ho ya nahin ho
chand alfaz ise shahkar bana dete hain
tajarbe par hai na.e ilm ki buniyad sada
da.era dekh ke parkar bana dete hain
sahab-e-kun-fayakun mere bhi siine men utaar
lafz jo aag ko gulzar bana dete hain
itna asan nahin ye ishq dobara banna
aap kahte hain to sarkar bana dete hain
hami miTTi hain hami chaak hami kuza-gar
aap ko jo bhi hai darkar bana dete hain
apne darvaze pe ‘fa.ez’ hai shab-o-roz hujum
ham hain vo log jo kirdar bana dete hain
Leave a Reply