Syeda Nafis Bano Shama
jism o jaan sulagte hain barishon ka mausam hai
ab to laut kar aa ja chahaton ka mausam hai
mere khushk honton par qahqahe to hain lekin
meri ruuh ke andar siskiyon ka mausam hai
khvab aur nindon ka khatm ho gaya rishta
muddaton se ankhon men rat-jagon ka mausam hai
tha mire khayalon men gulshan ik tamanna ka
mujh ko ye guman guzra khushbuon ka mausam hai
shakh-e-gham pe khil utthe phuul kuchh umidon ke
‘shama’ qarya-e-dil men khvahishon ka mausam hai
Leave a Reply