Kitna Hasin Tha Tu Kabhi Kuchh KHayal Kar

kitnā hasīn thā tū kabhī kuchh ḳhayāl kar

ab aur apne aap ko mat pā.emāl kar

marne ke Dar se aur kahāñ tak jiyegā tū

jiine ke din tamām hue intiqāl kar

ik yaad rah ga.ī hai magar vo bhī kam nahīñ

ik dard rah gayā hai so rakhnā sambhāl kar

dekhā to sab ke sar pe gunāhoñ kā bojh thā

ḳhush the tamām nekiyāñ dariyā meñ Daal kar

ḳhvāja ke dar se koī bhī ḳhālī nahīñ gayā

aayā hai itne duur to ‘alvī’ savāl kar

Leave a Comment