Abbas Rizvi
ham tire husn-e-jahan-tab se dar jaate hain
aise muflis hain ki asbab se dar jaate hain
khauf aisa hai ki duniya ke satae hue log
kabhi mimbar kabhi mehrab se dar jaate hain
raat ke pichhle pahar niind men chalte hue log
khuun hote hue mahtab se dar jaate hain
shaad rahte hain isi jama-e-uryani men
haan magar atlas-o-kamkhvab se dar jaate hain
kabhi karte hain mubaraz-e-talabi duniya se
aur kabhi khvahish-e-betab se dar jaate hain
ji to kahta hai ki chaliye usi kuche ki taraf
ham tiri bazm ke adab se dar jaate hain
ham to vo hain ki jinhen raas nahin koi nagar
kabhi sahil kabhi girdab se dar jaate hain
Leave a Reply