Jo Jal uThi Hai Shabistan Mein Yaad Si Kya Hai

jo jal uThī hai shabistāñ meñ yaad sī kyā hai

ye jhilmilāhaTeñ kyā haiñ ye raushnī kyā hai

kisī se tark-e-ta.alluq ke ba.ad bhī milnā

burā zarūr hai lekin kabhī kabhī kyā hai

ab apne haal pe ham dhyān hī nahīñ dete

na jaane be-ḳhabarī hai ki āgahī kyā hai

yahī savāl nahīñ hai faqat ki ham kyā haiñ

ye kā.enāt hai kyā aur zindagī kyā hai

hañsī jo dekh rahe ho hamāre hoñToñ par

zabān-e-hāl se ik chīḳh hai hañsī kyā hai

‘shu.ūr’ abhī se ye ḳhush-fahmiyāñ ye ummīdeñ

abhī to sirf mulāqāt hai abhī kyā hai

Leave a Comment