ruḳhsat hua to aankh mila kar nahin gaya
vo kyuun gaya hai ye bhi bata kar nahin gaya
vo yuun gaya ki bad-e-saba yaad aa ga.i
ehsas tak bhi ham ko dila kar nahin gaya
yuun lag raha hai jaise abhi lauT aa.ega
jaate hue charagh bujha kar nahin gaya
bas ik lakir khinch gaya darmiyan men
divar raste men bana kar nahin gaya
shayad vo mil hi jaa.e magar justuju hai shart
vo apne naqsh-e-pa to miTa kar nahin gaya
ghar men hai aaj tak vahi ḳhushbu basi hui
lagta hai yuun ki jaise vo aa kar nahin gaya
tab tak to phuul jaisi hi taaza thi us ki yaad
jab tak vo pattiyon ko juda kar nahin gaya
rahne diya na us ne kisi kaam ka mujhe
aur ḳhaak men bhi mujh ko mila kar nahin gaya
vaisi hi be-talab hai abhi meri zindagi
vo ḳhar-o-ḳhas men aag laga kar nahin gaya
‘shahzad’ ye gila hi raha us ki zaat se
jaate hue vo koi gila kar nahin gaya
Leave a Reply