duniya luTi to duur se takta hi rah gaya
ankhon men ghar ke ḳhvab ka naqsha hi rah gaya
us ke badan ka loch tha dariya ki mauj men
sahil se main bahav ko takta hi rah gaya
duniya bahut qarib se uTh kar chali ga.i
baiTha main apne ghar men akela hi rah gaya
vo apna aks bhuul ke jaane laga to main
avaz de ke us ko bulata hi rah gaya
hamrah us ke saari baharen chali ga.iin
meri zaban pe phuul ka charcha hi rah gaya
kuchh is ada se aa ke mila ham se ‘ashk’ vo
ankhon men jazb ho ke sarapa hi rah gaya
Leave a Reply