lafz nagin ki tarah Daste hain goya.i men
ḳhamushi zahr mila deti hai tanha.i men
dil ki baton ko zaban par nahin aane dete
kitni zanjiren nazar aati hain yakja.i men
Thahre paani men gira sang ravani koi
chahiye taaza hua ruuh ki gahra.i men
kya nazar aa.ega mausam ke nashe men tujh ko
kitne patte hain ki uḌ jaate hain purva.i men
shab se pahle hi koi chand nikalo varna
dil bhi niklega andheron ki pazira.i men
khul ga.i aankh to ḳhauf aane laga hai ḳhud se
gham na ho jaa.en kahin apni hi pahna.i men
kis ke nazare ki ḳhvahish men giraftar hue
zaḳhm ankhon ke mile dil ki masiha.i men
Duub kar phir koi ubhra na safina gham ka
kitne tufan hain tire jism ki ra.ana.i men
mujh se puchho ki bayaban-e-safar kaisa hai
umr guzri hai miri badiya-paima.i men
ham bhi mar ja.enge jiine ki havas men aḳhir
kaam a.enge usi ma.arka-ara.i men
hansne valon men ka.i apne bhi shamil the ‘nadim’
shakl pahchani ga.i apni bhi rusva.i men
Leave a Reply