Figar Unnavi
kuchh kaam to aaya dil-e-nakam hamara
TuuTa hai to TuuTa hi sahi jaam hamara
jitna ise samjha kiye begana-e-tasir
itna to na tha jazba-e-dil ḳhaam hamara
ye kaun maqam aaya qadam uThte nahin hain
manzil pe Thaharna to na tha kaam hamara
ham jaise taḌapte hain taḌapte rahe din raat
kuchh kar na saki gardish-e-ayyam hamara
ye gardish-e-paimana hai ya gardish-e-taqdir
saaqi kisi saghar pe to ho naam hamara
phulon ki hansi ba.is-e-taḳhrib-e-chaman hai
kanTon pe nahin hai koi ilzam hamara
ham gardish-e-saghar ko nigahon men liye hain
dekhe koi husn-e-talab-e-jam hamara
aghaz-e-mohabbat hi ka e.ajaz-e-karam hai
dil ho gaya begana-e-anjam hamara
andaz taḌapne ka judagana hai lekin
hai koi ‘figar’ aur bhi hamnam hamara
Leave a Reply