dilbar se ham apne jab milenge
is gum-shuda dil se tab milenge
ye kis ko khabar hai ab ke bichhde
kya janiye us se kab milenge
jan-o-dil-o-hosh-o-sabr-o-taqat
ik milne se us ke sab milenge
duniya hai sambhal ke dil lagana
yaan log ajab ajab milenge
zahir men to dhab nahin hai koi
ham yaar se kis sabab milenge
hoga kabhi vo bhi daur jo ham
dildar se roz-o-shab milenge
aram ‘hasan’ tabhi to hoga
us lab se jab apne lab milenge