itna hi sahara dil-e-nakam bahut hai
ab un ka tasavvur hi sar-e-sham bahut hai
ab koi zarurat hai dava ki na dua ki
jis haal men huun main mujhe aram bahut hai
girya se hai aghaz-e-amal bazm-e-jahan men
insan ko andesha-e-anjam bahut hai
kam-zarf hain karte hain jo piine se takalluf
saaqi mujhe ye durd-e-tah-e-jam bahut hai
ubhri nahin dil men kabhi ummid-e-karam bhi
tera ye karam gardish-e-ayyam bahut hai
main naam na lunga kabhi fariyad-o-fughan ka
jiita huun mohabbat men yahi kaam bahut hai
ham jaate hain pyase tire mai-ḳhane se saaqi
sunte to ye the tera karam aam bahut hai
ahbab karen ab na ‘sa.id’ is men izafa
dushman se jo milta hai vo in.aam bahut hai
Leave a Reply