Abdussalam Asim
haan vo main hi huun ki jis ke hain yahan pursan bahut
aaina hai dekh kar surat miri hairan bahut
is nadi men paar utarne ke hain andeshe hazar
aur is men duub jaane ke bhi hain imkan bahut
darmiyan rashk-o-hasad ke aaj bhi uljhe hain log
tha garan kal bhi ilaj-e-tishnagi-daman bahut
jis ghadi tuuta tha donon ke taalluq ka tilism
asman hairan hua tha aur zamin giryan bahut
har muhajir ke ilaj-e-gham ki tarjihat men
ham-zaban mil jaana bhi hai dard ka darman bahut
Leave a Reply