ik nasha sa zehn par chhane laga
aap ka chehra mujhe bhane laga
chandni bistar pe itrane lagi
chand banhon men nazar aane laga
ruuh par madhoshiyan chhane lagin
jism ghazlen vasl ki gaane laga
tum karam-farma hue sad-shukriya
ḳhvab mera mujh ko yaad aane laga
rafta rafta yasmin khilne lagi
mausam-e-gul ishq farmane laga
zulf ki ḳhushbu shagufta lab ‘kanval’
manzar-e-pur-kaif dikhlane laga
Leave a Reply