koi jab chhin leta hai mata-e-sabr miTTi se
to apne aap ug aati hai us ki qabr miTTi se
saja rakha tha ma.abad ke kisi tarik goshe men
bana kar ek dast-e-mehrban ne abr miTTi se
kahan ji shaad rahta hai faqat kar-e-mohabbat men
ki virse men mila hai aadmi ko jabr miTTi se
main is kuuze ke paani se koi shamshir Dhalunga
aur us ko a.ine se aab dunga sabr miTTi se
vo kis duniya se aa.e hain vo kis duniya ke baasi hain
banate hain jo gahre paniyon men qabr miTTi se
isi duniya men baste hain ajab kuchh log aise bhi
jo pal men khinch sakte hain rida-e-jabr miTTi se
main agle jashn men chumunga un be-dagh hathon ko
ki jin hathon ne Dhala hai charagh-e-abr miTTi se
Leave a Reply