Sahir Ludhianvi
jurm-e-ulfat pe hamen log saza dete hain
kaise nadan hain shoalon ko hava dete hain
ham se divane kahin tark-e-vafa karte hain
jaan jaae ki rahe baat nibha dete hain
aap daulat ke tarazu men dilon ko taulen
ham mohabbat se mohabbat ka sila dete hain
takht kya chiiz hai aur laal-o-javahar kya hain
ishq vaale to khudai bhi luta dete hain
ham ne dil de bhi diya ahd-e-vafa le bhi liya
aap ab shauq se de len jo saza dete hain
Leave a Reply