dar ke kisi se chhup jaata hai jaise saanp khazane men
zar ke zor se zinda hain sab khaak ke is virane men
jaise rasm ada karte hon shahron ki abadi men
subh ko ghar se duur nikal kar shaam ko vapas aane men
niile rang men duubi anhken khuli padi thiin sabze par
aks pada tha asaman ka shayad is paimane men
dabi hui hai zer-e-zamin ik dahshat gung sadaon ki
bijli si kahin laraz rahi hai kisi chhupe tah-khane men
dil kuchh aur bhi sard hua hai sham-e-shahr ki raunaq se
kitni ziya be-sud gai shishe ke lafz jalane men
main to ‘munir’ aine men khud ko tak kar hairan hua
ye chehra kuchh aur tarah tha pahle kisi zamane men
Leave a Reply