miTTi tha aur duudh men gundha gaya mujhe
ik chand ke vajud men gundha gaya mujhe
main niist aur nabud ki ik kaifiyat men tha
jab vahm-e-hast-o-bud men gundha gaya mujhe
main chashm-e-kam-rasa se jise dekhta na tha
us ḳhvab-e-la-hudud men gundha gaya mujhe
ḳhas-ḳhana-e-ziyan ki shararbariyon ke ba.ad
yaḳh-zar-e-nar-e-sud men gundha gaya mujhe
ik dast-e-ghaib ne mujhe la chaak par dhara
phir vaqt ke jumud men gundha gaya mujhe
is men to asman ke shajar bhi samar na den
jis ḳhak-e-be-numud men gundha gaya mujhe
qaus-e-quzah ki samt bahut dekhta tha main
aḳhir ghubar-o-dud men gundha gaya mujhe
Leave a Reply