Aslam Mahmood
pattharon par vadiyon men naqsh-e-pa mera bhi hai
raston se manzilon tak silsila mera bhi hai
paanv us ke bhi nahin uThte mire ghar ki taraf
aur ab ke rasta badla hua mera bhi hai
habs ke aalam men bhi zinda huun teri aas par
ai hava-e-taza darvaza khula mera bhi hai
badalon se ai zamin tu hi nahin hai na-umid
ra.egan sa ab ke kuchh harf-e-dua mera bhi hai
be-basarat shahr men be-chehragi ke darmiyan
ik diya jalta hua ik a.ina mera bhi hai
dekhta huun main bhi sab ke saath duniya ko magar
ik alag zauq-e-nazar ik zaviya mera bhi hai
tirgi men aaj agar main huun to ho sakta hai kal
dastaras men chand ho aḳhir ḳhuda mera bhi hai
Leave a Reply