Pattharon Par Wadiyon Mein Naqsh-E-Pa Mera Bhi Hai

pattharoñ par vādiyoñ meñ naqsh-e-pā merā bhī hai

rāstoñ se manziloñ tak silsila merā bhī hai

paañv us ke bhī nahīñ uThte mire ghar kī taraf

aur ab ke rāsta badlā huā merā bhī hai

habs ke aalam meñ bhī zinda huuñ terī aas par

ai havā-e-tāza darvāza khulā merā bhī hai

bādaloñ se ai zamīñ tū hī nahīñ hai nā-umīd

rā.egāñ sā ab ke kuchh harf-e-duā merā bhī hai

be-basārat shahr meñ be-chehragī ke darmiyāñ

ik diyā jaltā huā ik ā.īna merā bhī hai

dekhtā huuñ maiñ bhī sab ke saath duniyā ko magar

ik alag zauq-e-nazar ik zāviya merā bhī hai

tīrgī meñ aaj agar maiñ huuñ to ho saktā hai kal

dastaras meñ chāñd ho āḳhir ḳhudā merā bhī hai

Leave a Comment