gham nahin hai chahe jitni tirgi qaa.em rahe
mujh pe bas teri nazar ki chandni qaa.em rahe
is liye oḌhe hue huun main ḳhizaon ki rida
mere gulshan ki faza men tazgi qaa.em rahe
ham-nashin itna bata de kya karun tere baghair
kis tarah sanson se aari zindagi qaa.em rahe
rang-e-ulfat ki baqa ke vaste mere ḳhuda
ashiqi qaa.em rahe aur dilbari qaa.em rahe
khare paani ka samundar yuun hua mujh ko ata
umr bhar honTon pe mere tishnagi qaa.em rahe
jab harif-e-jan hi dil ki dhaḌkanon men aa base
ghair mumkin hai kisi se dosti qaa.em rahe
bo.e ‘mina’ raat ke kheton men yuun suraj ke biij
apni koshish hai jahan men raushni qaa.em rahe
Leave a Reply