aankh tumhari mast bhi hai aur masti ka paimana bhi
ek chhalakte saghar men mai bhi hai mai-ḳhana bhi
be-ḳhudi-e-dil ka kya kahna sab kuchh hai aur kuchh bhi nahin
hasti se manus bhi huun hasti se begana bhi
husn ne tere duniya men kaisi aag laga di hai
barq bhi sho.ala barpa hai raqs men hai parvana bhi
vus.at-e-vahshat tang hui bigḌa ghar divanon ka
najd ke ik sauda.i ne luuT liya virana bhi
aaj mohabbat rusva hai hathon se hoshyaron ke
ishq ki pahli duniya men tha koi divana bhi
dil ki duniya hilti hai roko apni nazron ko
kafir luuTe leti hain aaj tajalli-ḳhana bhi
gardish mast nigahon ki aḳhir vajd-angez hui
chakkar men ‘saghar’ bhi hai daur men hai paimana bhi
Leave a Reply