zaKHm-E-Dil Par Bahaar Dekha Hai

zaḳhm-e-dil par bahār dekhā hai

kyā ajab lāla-zār dekhā hai

jin ke dāman meñ kuchh nahīñ hotā

un ke sīnoñ meñ pyaar dekhā hai

ḳhaak uḌtī hai terī galiyoñ meñ

zindagī kā vaqār dekhā hai

tishnagī hai sadaf ke hoñToñ par

gul kā siina figār dekhā hai

sāqiyā! ehtimām-e-bāda kar

vaqt ko sogvār dekhā hai

jazba-e-ġham kī ḳhair ho ‘sāġhar’

hasratoñ par nikhār dekhā hai

Leave a Comment